نقلا عن مجلة البيادر السياسي المقدسية
القدس ومقدساتها بتنادي..ويـــن النشامـــى ويـــن الرجـــال
القدس ومقدساتها بتنادي..ويـــن النشامـــى ويـــن الرجـــال
ندى الحايك خزمو
يا جماعة شو بتستنوا
ولإيمتا راح تضلوا نايمين
على اللي بصير في القدس
وانتوا عاملين مش سامعين
مغمضين عنيكم عنها
وكأنكم مش شايفين
يا جماعة شو بتستنوا
ولإيمتا راح تضلوا ساكتين
على اللي بصير في القدس
وانتوا عاملين حزنانين
بس بتتباكوا عليها
وفي الآخر إلها مطنشين
نتتياهو أعلنها ببجاحة
وقبله كل زعماء اسرائيل
القدس عاصمة الدولة العبرية
موحدة ومن دون عراقيل
والتحركات لهدم الأقصى
بتعمل في النهار والليل
لبناء الهيكل المزعوم
واحنا بنغني يا عين يا ليل
يا جماعة شو بتستنوا
ولإيمتا راح تضلوا مهملين
ما بتتذكروا شو اللي صار
وكيف كان الوضع من سنين
لما شارون دخل الأقصى
واستفز مشاعر المؤمنين
انتفاضة شعللت نارها
لانه الناس كانوا صاحيين
أما اليوم الوضع تغير
الناس نايمين ومش سائلين
اهرونوفيتش في الأقصى تمختر
واستفز مشاعر المسلمين
ورغم هيك ما حدا تحرك
غير شجب وشوية مستنكرين
وينكم يا ناس شو صارلكم
وين النشامى والمدافعين
وين اللي حاملين لواء القدس
وين العرب والمسلمين
الأنفاق تحت الأقصى شغالة
وانتوا نايمين ومش داريين
طالت غفوتكم يا جماعة
اصحوا يا بني آدمين
يا جماعة شو عم بتستنوا
ولإيمتا راح تضلوا تتعاموا
على اللي بصير في القدس
ولأهلها اللي عم يعانوا
شوي شوي المدينة بتتفرغ
من سكانها العرب اللي كانوا
أصل المدينة على مدى العصور
وفلسطينيين ما راح فيها تلاقوا
ما بين قرارات بهدم بيوتهم
وما بين بيوت اليهود عليها استولوا
وما بين اجراءات وتهديدات
وضغوطات لحتى المدينة يفرغوا
يا ناس شو بتستنوا
وايمتا ناويين تتحركوا
اليهود ليل نهار بيشتغلوا
ومليارات الدولارات رصدوا
لتوسيع الاستيطان فيها
وحتى الغور راح يوصلوا
"معاليه أدوميم راح تلتقي
مع توسعهم بمستوطنة "يريحو"
وكثير اراضي صادروا
حتى القدس يوسعوا
مش مكفيهم اللي أخذوها
لسا في حواليها عم يطمعوا
حرب أعلنتها اسرائيل
على كل الجبهات..
ضد القدس وسكانها
وعلى كافة المستويات
أحياءها ومنازلها وقطاعاتها
وعلى كل المقدسات
لا سائلين عن قوانين
أو وثائق أومستندات
اللي أبرزها أصحابها
وبتأكد زيف الادعاءات
شو بده يردعهم ما دام
نحنا غاطسين في سبات
وما بنعمل شي غير
شوية استنكارات وتنديدات
وصرنا ما بنعرف غير
عقد اللقاءات والمؤتمرات
اللي ما بتغني ولا بتسمن
ولا بتصد الاعتداءات
كنيس يهودي أقاموا
على بعد أمتار من ثالت الحرمين
على ارض وقف اسلامي
في منطقة حمام العين
اصحوا فالاعتداءات عم تطول
مقدساتنا وأولى القبلتين
يا ناس شو بتستنوا
والتصعيد ضد القدس شغّال
ملامحها العربية اندثرت
والتهويد فيها فعّال
الحلم الصهيوني عم بتحقق
وانتوا ولا على البال
القدس راح تروح منا
بكفي نوم.. بكفي اهمال
القدس ومقدساتها بتنادي
وين النشامى وين الرجال
